महाराष्ट्रात शाळा प्रवेशासाठी विद्यार्थी आणि पालक दोघांचेही आधार अनिवार्य!! नवीन मार्गदर्शक सूचना

महाराष्ट्रात अनेक शाळा खोटी मुलाची पटसंख्या दाखवून सरकारी अनुदान मिळवत आहेत आणि मुलांची शाळेतील संख्या नाममात्र किंवा तेही नसते हे टाळण्यासाठी आता राज्य सरकारने एक महत्वाचा निर्णय घेतला आहे. तो म्हणजे शाळेत प्रवेश घेताना आता विद्यार्थ्यांसोबतच त्यांच्या पालकांचं आधार कार्ड देखील लिंक केलं जाणार आहे. 
राज्यात विविध ठिकाणच्या शाळेत विद्यार्थ्यांची बोगस उपस्थिती दाखवून कोट्यवधी रुपयांचे अनुदान लाटले जात होते. हा गैर प्रकारस टाप लावण्यासाठी राज्य सरकारने मोठा निर्णय घेतला आहे. यापुढे शाळेत प्रवेशासाठी विद्यार्थी आणि पालकांनाही आता आधार सक्ती करण्यात आली आहे. यामुळे मुलांच्या बोगस प्रवेशाला चाप बसणार आहे.

काय आहे प्रकरण?

बीड जिल्ह्यातील बोगस विद्यार्थी पटसंख्या घोटाळा उघडकीस आल्यावर राज्य सरकारने निवृत्त न्यायमूर्ती पी व्ही हरदास यांच्या अध्यक्षतेखाली समिती गठीत केली होती. या समितीचा अहवाल स्वीकारून राज्य सरकारने विद्यार्थ्यांच्या शाळा प्रवेशाबाबत नवीन मार्गदर्शक सूचना निर्गमित केल्या आहेत आणि राज्य सरकारला या पुढे आर्थिक फटका बसू नये या साठी हा निर्णय घेतला असून आता शाळा प्रवेशासाठी मुलांबरोबर पालकांचे आधार कार्ड देखील बंधनकारक राहणार आहे.

या नव्या नियमानुसार बोगस पटसंख्या शोधण्यासाठी शिक्षणाधिकारी, शिक्षण निरीक्षक, गटशिक्षणाधिकारी, केंद्र प्रमुख यांनी वर्षांतून दोन वेळा शाळेला भेट देऊन विद्यार्थ्यांची पटपडताळणी करावी. या पडताळणीत काही विसंगती आढळल्यास त्यांनी एक महिन्यात सखोल चौकशी करावी आणि त्यात दोषी आढळणाऱ्यांविरोधात पोलीस ठाण्यात गुन्हा दाखल करावा असे आदेश देण्यात आले आहेत. चौकशी करताना सबंधित शैक्षणिक संस्थेची आवश्यक नोंदवही आणि कागदपत्रे जप्त करण्याचे अधिकार शिक्षणाधिकारी व अन्य अधिकाऱ्यांना देण्यात आले आहेत.

शालेय शिक्षण विभागाच्या मार्गदर्शक सूचना किंवा शाळा प्रवेशाबाबतच्या नवीन मार्गदर्शक सूचना

• नव्या सूचना नुसार विद्यार्थाच्या शाळाप्रवेशावेळी पालकांकडून दोन प्रतींमध्ये अर्ज घ्यावा
• शाळेतील प्रवेश हा विद्यार्थ्यांच्या आधार कार्डसोबत जोडावे 
• शाळेत प्रवेश अर्ज जोडताना पालकांचे सुद्धा आधार कार्ड बंधनकारक 
• शाळा व्यवस्थापन समिती ही प्रवेश देखरेख समिती म्हणून काम करेल
• विद्यार्थ्यांना शाळेत प्रवेश देताना शाळांनी पालकांकडून दोन प्रतीमध्ये प्रवेश अर्ज भरून घ्यावा. प्रवेश अर्जावर पालकांची सही आवश्यक आहे. 
• प्रवेश अर्जावर पालक आणि विद्यार्थ्यांचे फोटो लावलेले असावेत. 
• प्रवेश अर्जाची एक प्रत केंद्र प्रमुखास देण्यात यावी. तर एक प्रत शाळा व्यवस्थापन समितीस देण्यात यावी.
• शिक्षण अधिकारी आणि गट शिक्षणाधिकारी यांनी सहामहिन्यातून प्रत्यक्ष जाऊन विद्यार्थ्यांची हजेरी/ गैरहजेरी पडताळणीकरावी त्यात गैरप्रकार आढळून आल्यास संबंधित पोलीस ठाण्यात एफ आय आर दाखल करावा. 
• जर पालक काही कारणांमुळे आधारकार्ड सादर करू शकले नाही तर अशावेळी पालकांचे आधारकार्ड सादर करण्याच्या अटीच्या अधीन राहून विद्यार्थ्यांना तात्पुरता प्रवेश देण्यात यावा.

अनियमितता आढळून आलेल्या शैक्षणिक संस्थांचे अनुदान परत घेण्याबाबत किंवा अनुदान थांबवण्याबाबत तसेच शाळेची मान्यता काढून घेण्याबाबतचा प्रस्ताव शिक्षणाधिकारी यांनी संचालकांमार्फत तत्काळ शासनास सादर केला जाणार आहे. एखाद्या पालकाने आधार कार्ड दिले नाही तर मुलाचा प्रवेश रद्द करण्याचे अधिकार आता शाळांना मिळणार आहे.