கொரோனாவின் முதல் அலையை விட இரண்டாவது அலையின் தாக்கம் அதிகமாக இருந்தது. அதனால் மூன்றாவது அலையும் இதைவிட மோசமானதாக இருக்குமோ என்ற அச்சம் அதிகளவில் ஏற்படுகின்றது. குறிப்பாக குழந்தைகள் இந்த அலையில் அதிகமாக பாதிக்கப்படுவார்களோ என்று பெற்றோர் நமக்கு பதட்டத்தை அதிகரிக்கும் வகையில் தகவல்களும் வெளியாகின்றது.  உண்மையில் மூன்றாவது அலை குழந்தைகளை பாதிக்குமா? மருத்துவ நிபுணர்கள் என்ன கூறுகிறார்கள்? அதற்கான முன்னெச்சரிக்கை நடவடிக்கைகள் என்னென்ன பின்பற்ற வேண்டும் என்பதை இந்த பதிவில் பார்க்கலாம்.

கொரோனாவின் மூன்றாவது அலை என்றால் என்ன?

ஏன் இந்த தொற்று அலைகளாக மாறுகின்றது என்ற சந்தேகம் எல்லோருமே இருக்கின்றது. அதாவது வைரஸ் மாற்றமடையும் போது, அதிக பாதிப்பு ஏற்படுத்தும் வகைகள் உருவாகின்றன. 1918-ல் ஸ்பானிஷ் காய்ச்சலின் போதும், 2009-ல் பன்றி காய்ச்சலின் போதும் இதே மாதிரி சூழல் தான் இருந்தது. சுவாச பாதிப்பு ஏற்படுத்தும் வைரஸான கொரோனா அலைகளாக தாக்கும்.

எப்போதும் கொரோனா தொற்று குறைந்தவுடன் கட்டுப்பாடுகள் தளர்த்தப்படும். அப்போது நாம் மாஸ்க் அணியாமல், சமூக இடைவெளி கடைப்பிடிக்காமல், கைகளை சுத்தமாக வைக்காமல் இருப்பது, தடுப்புமுறைகளை முறையாக பின்பற்றாமல் இருந்தால் புதிய அலை உண்டாகும் என்று மருத்துவ நிபுணர்கள் எச்சரிக்கின்றனர்.

இரண்டாவது அலையில் குழந்தைகள் அதிகம் பாதிக்கப்பட்டார்களா?

இரண்டாம் அலையில் பெரும்பாலான குழந்தைகள் லேசான அறிகுறிகளோடும் அல்லது அறிகுறி இல்லாமலும் இருந்தார்கள். குறிப்பாக வீட்டில் 10 வயதுக்கு குறைவான குழந்தைகளுக்கு சளி, காய்ச்சல், வயிற்றுப்போக்கு போன்ற அறிகுறிகள் காணப்பட்டது. இதிலும் வீட்டில் மற்றவர்கள் கொரோனாவல் பாதிக்கப்பட்டது தான் இந்த குழந்தைகளுக்கு பாதிப்பு ஏற்படுவதற்கான முக்கிய காரணமாக அமைந்தது.

• சமீபத்திய தேசிய செரோ-கணக்கெடுப்பின்படி, கணக்கெடுக்கப்பட்ட குழந்தைகளில் 25 சதவிகிதம் குழந்தைகள் கோவிட்- 19 ஆல் பாதிக்கப்படுவது கண்டறியப்பட்டது.
• கொரோனாவின் முதல் அலையின் போது 3-4 சதவித குழந்தைகளுக்கு கொரோனாவின் மிதமான அறிகுறிகளை பெற்றிருந்தார்கள். இரண்டாவது அலையிலும் இந்த சதவிகிதம் அப்படியே தான் உள்ளது என்று தகவல்கள் கூறுகின்றது. இந்த முறை பெற்றோர் அதிகளவில் பாதிக்கப்பட்டதால் குழந்தைகளும் அதிகளவில் பாதிப்புக்கு உள்ளானார்கள்.

அதனால் பெற்றோர்கள் பயப்பட வேண்டாம். மருத்துவரிடம் ஆலோசனை கேட்பது என்பது எப்போதுமே சிறந்தது. ஏனென்றால் மிதமான அறிகுறி அல்லது தீவிர அறிகுறிகளை குழந்தைகளிடம் நம்மால் தீர்மானிக்க இயலாது. குழந்தையைத் தொடர்ந்து கண்கானித்துக் கொண்டே இருப்பது நல்லது. குழந்தைகளின் இயல்பான நடவடிக்கையில் மாற்றம் தெரிந்தால், மிகுந்த சோர்வு, தொடர்ந்து 4 நாட்களுக்கு மேல் காய்ச்ச போன்ற அசாதாரண அறிகுறிகள் இருந்தால் மருத்துவரிடம் அழைத்து செல்ல வேண்டும்.

மூன்றாவது அலையில் குழந்தைகள் அதிகமாக பாதிக்கப்படுவார்களா?

கொரோனாவின் அடுத்தடுத்த அலைகளால் குழந்தைகள் கடுமையாக பாதிக்கப்படுவார்கள் என்பதை நிரூபிப்பதற்கான எந்தவொரு தரவும் இந்திய அளவிலோ அல்லது சர்வதேச அளவிலோ இல்லை என்று டெல்லி எய்ம்ஸ் கூறியிருக்கிறது.

மேலும் இரண்டாம் அலையில் பாதிக்கப்பட்ட குழந்தைகள் இணை நோய் அதாவது பிறவி இதய நோய், நீரிழிவு நோய், ஆஸ்துமா அல்லது குழந்தைப் பருவ புற்றுநோயால் பாதிக்கப்பட்டவர்கள் அல்லது நோய் எதிர்ப்பு திறன் குறைந்த குழந்தைகள் மருத்துவமனைகளில் சிகிச்சை பெறும் நிலை இருந்தது. லேசான அறிகுறி உள்ள குழந்தைகள் வீட்டிலேயே மருந்துகள் மற்றும் பாதுகாப்பு நடவடிக்கைகளை பின்பற்றி குணமடைந்தனர்.

மூன்றாம் அலையிலும் இணை நோய் உள்ள குழந்தைகளின் பெற்றோர் மிகுந்த கவனத்துடன் இருக்க வேண்டும். காய்ச்சல், சளி போன்ற அறிகுறி இருந்தாலும் முன்னதாகவே என்ன தொற்று என்பதை கண்டறிந்து சிகிச்சை கொடுப்பது அவசியம்.

மூன்றாம் அலை எப்போது வரும் என்று கணிக்கப்படுகின்றது

உலகில் மூன்று அலைகளையும் முதலில் கண்ட நாடுகள் அமெரிக்கா, இங்கிலாந்து மற்றும் ஐரோப்பா. இந்த மூன்று நாடுகளும் மூன்றாம் அலையில் கடுமையாக பாதிக்கப்பட்ட நாடுகள். மூன்றாம் அலை 6 முதல் 8 மாதங்களுக்குள் வர வாய்ப்புள்ளதாக மருத்துவ உலகம் கணித்துள்ளது.

ஏன் இந்த பதட்டம் என்பதற்கு உதாரணமாக இருப்பது அமெரிக்கா தான். வேறெந்த சான்றும் இல்லை. அமெரிக்காவில் இரண்டாம் அலையில் 3% குழந்தைகள் பாதிக்கப்பட்டார்கள். அதே மூன்றாம் அலையில் 33 % குழந்தைகள் பாதிக்கப்பட்டார்கள். அதனால் தான் இந்த அச்சம் மற்ற நாடுகளுக்கும் பரவத் தொடங்கியுள்ளது.

எதிர்காலத்தில் வரும் கொரோனா அலைகளிலிருது குழந்தைகளை காப்பதற்கு என்னென்ன பின்பற்ற வேண்டும்

கோவிட்-19 நோய்த்தொற்று வராமல் தடுக்க பாதுகாப்பு நடவடிக்கைளை பெரியவர்கள் பின்பற்ற அறிவுறுத்தப்படுகின்றது. அதே போல் குழந்தைகளை எவ்வாறு பின்பற்ற ஊக்கப்படுத்துவது.

இரண்டாம் அலையில் குழந்தைகளுக்கு முதல் அலையை விட அறிகுறிகள் அதிகம் காணப்பட்டது. மூன்றாம் அலையில் குழந்தைகளுக்கு மூச்சுத்திணறல் வருவதற்கான தொற்றாக மாற வாய்ப்பு இருப்பதாக மருத்துவர்கள் கூறுகிறார்கள். இதில் நிம்மதியடையும் விஷயம், 95 % சதவிகித குழந்தைகள் ஆபத்தான பாதிப்புள்ள அறிகுறிகளோடு இருப்பதில்லை. மீதி 5 சதவிகிதம் குழந்தைகலே ஆபத்தான நிலைக்கு செல்வதால் பெற்றோர்கள் பதற்றம் அடைய அவசியமில்லை. குழந்தைகளுக்கு நான்கு நாட்களுக்கு மேல் காய்ச்சல், இருமல், மூச்சுத்திணறல், எப்போதும் சோர்வு, சாப்பிட இயலாமை, சருமத்தில் சிவப்புத் திட்டுகள் இருந்தால் உடனடியாக அவர்கள் மருத்துவமனையில் அனுமதிக்கப்பட வேண்டும். தாமதிக்காமல் மருத்துவமனைக்கு செல்லவும்.

பின்பற்ற வேண்டிய பாதுகாப்பு குறிப்புகள்

• குழந்தைகள் அதிகமாக வெளியாட்களிடம் தொடர்பு கொள்வதை தவிர்க்கவும். குடும்பத்தில் உள்ள ஒவ்வொரு உறுப்பினரும் கோவிட் பரிசோதனை மேற்கொள்வதன் மூலம் தொற்று இல்லாததை உறுதி செய்ய முடியும்.
• 2 வயதுக்கு குறைவான குழந்தைகளுக்கு மாஸ்க் அணிய பரிந்திரைக்கப்படவில்லை என்பதால் குழந்தையை பராமரிப்பவர்கள் அல்லது உணவூட்டுவது, நெருக்கமாக இருப்பவர்கள், பராமரிப்பாளர்கள் முழு பாதுகாப்புடன் இருக்க வேண்டும். மாஸ்க் அணுவது, கை சுத்தம், சுகாதாரம் பேணுவது போன்ற பாதுகாப்பு நடவடிக்கைகளை முறையாக பின்பற்றுவதை உறுதிப்படுத்தவும்.
• தாய்ப்பாலூட்டும் தாய்மார்கள் கொரோனாவால் பாதிக்கப்பட்டால் இரண்டு முகக்கவசம் மற்றும் முகம் மறைக்கும் படியான ஷீல்டு அணிந்து, கைகளைக் கழுவி, தனது சுற்றுப்புறங்களைத் தவறாமல் சுத்தம் செய்து பாலூட்ட வேண்டும். தாய்ப்பாலில் கொரோனா வைரஸுக்கு எதிரான ஆண்டிபாடிகள் உள்ளது. இது குழந்தைக்கு மிகவும் நல்லது.
• பாலூட்டும் தாய்மார்களுக்கு தடுப்பூசி பாதுகாப்பது என கண்டறியப்பட்டுள்ளது. அதனால் அவர்கள் தடுப்பூசி போட்டுக் கொள்ளலாம்.
• 12 வயதுக்கு மேற்பட்ட குழந்தைகள் பெரியர்கள் பின்பற்றும் பாதுகாப்பு நடவடிக்கைகளை பின்பற்றலாம்.
• குழந்தைகளுக்கான கொரோனா தடுப்பூசி தற்போது சோதனையில் உள்ளதால் பெற்றோர் மற்றும் வீட்டில் இருக்கும் மற்ற பெரியவர்கள் கட்டாயம் தடுப்பூசி போட்டிருக்க வேண்டும். இதன் மூலம் பெரியவர்கள் மூலமாக குழந்தைக்கு பரவுவதை தடுக்க முடியும். ஏனென்றால் இரண்டாம் அலையில் பெரும்பாலும் பெரியவர்கள் மூலமாகவே குழந்தைகளுக்கு பரவியது என்பதை மறுக்க முடியாது.
• கோவேக்சின்  தடுப்பூசியை 2 – 18 வயதுள்ள இந்தியக் குழந்தைகளுக்குச் செலுத்திப் பரிசோதினை தொடங்கிய நிலையில் பெற்றோரும் குழந்தைகளுக்கு தடுப்பூசி போட தயக்கம் காட்டக்கூடாது.

வீட்டில் குழந்தைகளை மற்ற செயல்பாடுகளில் ஈடுபடுத்த வேண்டியது அவசியம்

குழந்தையின் முதல் 5 வயது என்பது அவர்களின் உடல் மற்றும் மன வளர்ச்சிக்கு முக்கியமான பருவமாகும். இந்த நெருக்கடியான சூழலில் பெற்றோர் நாள் முழுவதும் ஈடுபட வைப்பது கடினம் தான். ஆனால் அவர்களின் வயதுகேற்ற மைற்கற்களை அடைவதற்கான சூழலை வீட்டிற்குள் உருவாக்கி கொடுக்க வேண்டியது அவசியம். என்னென்ன வழிகளில் உங்கள் குழந்தையின் ஆரோக்கியமான வளர்ச்சிக்கு உதவலாம்.

• வீட்டிற்குள்ளேயே குழந்தைகள் இருப்பதால் பேசுவதில் சிக்கல் ஏற்படுகின்றது. அதாவது மற்றவர்களோடு பழகுவது, பேசுவது போன்றவற்றுக்கான வாய்ப்பு இல்லை. குறிப்பாக குழந்தை முதன் முதலில் பேச ஆரம்பிக்கும் பருவத்தில்  அவர்களோடு நிறைய பேச வேண்டும். பெற்றோர் நேரம் கிடைக்கும் போதெல்லாம் கட்டளைகளை மட்டும் கூறாமல் பகிர்ந்து கொள்ளலாம். உங்க வீட்டு சூழலில் இருக்கும் விஷயங்களை பற்றியே பேசலாம்.
• கொஞ்சம் பெரிய குழந்தைகள் அதாவது 3 வயதுக்கு மேற்பட்ட குழந்தைகள்  விளையாட அதிகமாக ஆசைப்படுவார்கள். அதற்கும் வாய்ப்பு இல்லை. வீட்டிற்குள் ஓடி ஆடி விளையாடட்டும். இல்லையென்றால் மொபைலோ, டிவியோ பார்க்க வேண்டும் என்று அடம் பிடிப்பார்கள். வீட்டில் அன்றாடம் செய்யும் வேலைகளில் ஈடுபடுத்துங்கள். இந்த மாதிரி கொரோனா பெருந்தொற்று காலத்தில் குழந்தைகளை ஈட்டுபடுத்த பல வழிகள் உண்டு. டாஸ்க் கொடுத்தால் அவர்கள் அதில் ஈடுபட வருவார்கள். இல்லையென்றால் நம்மை அதிகம் எதிர்பார்க்க தொடங்குவார்கள். அவர்களுகென்று நாளை திட்டமிட முயற்சி செய்யவும்.
• 7 வயதுக்கு மேற்பட்ட குழந்தைகளுக்கு படிப்பு சார்ந்த விஷயங்களில் ஊக்குவிப்பது, மெதுவாக, பொறுமையாக அவர்களுக்கு என்ன சிக்கல் ஆன்லைன் வகுப்பில் இருக்கிறது என்பதை கேட்டு தெரிந்து கொண்டு உதவலாம். மைண்ட் கேம்ஸ் வாங்கி கொடுங்க. அல்லது வீட்டில் செய்யும் எல்லா வேலைகளிலும் ஈடுபடுத்தலாம்.

கொரோனா மூன்றாவது அலையை கண்டு அச்சம், பதட்டம் அடையாமல் குழந்தைகளை பாதுகாக்கும் நடவடிக்கைகளை அனைவரும் சேர்ந்து பின்பற்ற வேண்டும். சின்ன சின்ன விஷயங்கள் மூலம் குழந்தைகளுக்கே தங்களை பாதுகாப்பது குறித்த அறிவை வளர்க்க வேண்டும். விழிப்போடு இருப்போம், மூன்றாம் அலையையும் வெல்வோம்.